لذة القرب

سبحان الله .. لما الواحد يبقى بعيــــــــــــــــد عن ربنا وغرقان في الغفلة والنسيان .. ويبتدي الران والصديد يتكون على قلبه..ويقسى القلب ومايحسش بحاجة .. وتبقى الصلاة مجرد حركات ومافيهاش أي روح...مجرد إسقاط للفريضة .. وقراءة القرآن عشان بس تاخد حسنات وثواب القراءة..

وبعدين الواحد يبقى عايز يرجع ويتوب ويقرب من طريق ربنا .. لكن يخاف ويبقى مكسوف - من كتر معاصيه - من إنه يرفع ايده ويقول يا رب...

وتقرر أنك تمشي في الطريق لإن ببساطة البعد عن ربنا كان مسببلك الحزن والهم..

أول شوية بتلاقي إنك مش قادر..بتلاقي نفسك بتسرح كتير في الصلاة ومجاهدة النفس بتبقى صعبة .. وتسرح..وتفتكر..وترجع تاني..وتفضل تدعي " يا رب ارزقنا الخشوع .. يا رب قربني إليك .. يا رب طرقت بابك فلا تردني خائبا "..

وواحدة واحدة مع القرآن ومع رجلك اللي بتوجعك من كتر الوقفة في الصلاة . ومع كتر دعائك إن ربنا يقبلك ولا يردك خائب ..

تبدأ طبقات الران اللي على قلبك تذوب...ويبدأ القرآن يخترق الصديد اللي على قلبك ...

لحد ماتيجي اللحظة اللي تلاقي الدموع بتنزل من خشية الله ومن التدبر في آيات القرآن ..

وتلاقي نفسك بتبكي في آيات العذاب .. وتقول يا رب أجرنا ..

وبتبكي في آيات الرحمة والجنة وتقول يا رب لا تحرمنا...

القرب من ربنا بيبقى ليه طعم جميل .. وأجمل ما فيه إنك كل ما تقرب أكتر تحس إنك لسه بعيد ومحتاج تقرب أكتر وتعرف ربنا أكتر وتحبه أكتر...

يا رب أذقنا حلاوة القرب منك... يا الله ^_^

Top of Form